#Ghugus
• वेकोलि वणी क्षेत्रात आंतरराष्ट्रीय महिला दिन उत्साहात साजरा
सुवर्ण भारत:पंकज रामटेके (सहाय्यक जिल्हा प्रतिनिधी, चंद्रपूर)
घुग्घुस : वेस्टर्न कोलफिल्ड्स लिमिटेड (वेकोलि) च्या वणी क्षेत्रातील टेम्पो क्लब येथे ८ मार्च रोजी आंतरराष्ट्रीय महिला दिन उत्साहपूर्ण आणि गरिमामय वातावरणात साजरा करण्यात आला. यावेळी महिलांचा सन्मान, त्यांचे हक्क तसेच समाज व राष्ट्रनिर्मितीत महिलांचे महत्त्वपूर्ण योगदान यावर विशेष प्रकाश टाकण्यात आला. या कार्यक्रमाला मोठ्या संख्येने महिला कर्मचारी तसेच मान्यवरांची उपस्थिती होती.
हा कार्यक्रम वेकोलि वणी क्षेत्रातील कामगार संघटना एच.एम.एस. युनियनचे अध्यक्ष दीपक जैसवाल यांच्या मार्गदर्शनाखाली आयोजित करण्यात आला होता. कार्यक्रमाचे आयोजन एच.एम.एस. युनियन वणी क्षेत्राच्या महिला विंगच्या अध्यक्षा, सचिव तसेच महिला विंगच्या पदाधिकाऱ्यांनी आणि सदस्यांनी पुढाकार घेऊन केले. कार्यक्रम यशस्वी करण्यासाठी सर्वांनी सक्रिय सहभाग नोंदवला.
या कार्यक्रमाच्या प्रमुख अतिथी म्हणून घुग्घुस उपक्षेत्रातील श्रीमती स्मिता पार्थसारथी उपस्थित होत्या. तसेच प्रमुख पाहुण्यांमध्ये श्रीमती अर्चना दीपक टिकले, नेहा जितेंद्र सिंह, आरती शर्मा, पूनम मनोज नागले, शांती चुक्का, मीनाक्षी श्रीकांत तसेच श्रीमती बल्लेवार यांची मान्यवर उपस्थिती होती. सर्व मान्यवरांचे पुष्पगुच्छ देऊन स्वागत करण्यात आले.
यावेळी एच.एम.एस. युनियनच्या क्षेत्रीय अध्यक्षांनी आपल्या भाषणात सांगितले की समाजाच्या सर्वांगीण विकासामध्ये महिलांची भूमिका अत्यंत महत्त्वाची व प्रेरणादायी आहे. आज महिला आपल्या मेहनत, जिद्द आणि आत्मविश्वासाच्या जोरावर शिक्षण, विज्ञान, राजकारण, क्रीडा, प्रशासन तसेच उद्योग अशा विविध क्षेत्रांमध्ये उल्लेखनीय यश संपादन करत आहेत. त्यांनी आपल्या कर्तृत्वाने देशाचे नाव राष्ट्रीय तसेच आंतरराष्ट्रीय स्तरावर उज्ज्वल केले आहे. महिलांचा सन्मान राखणे, त्यांच्या हक्कांचे संरक्षण करणे आणि त्यांना पुढे जाण्यासाठी प्रोत्साहन देणे हे प्रत्येकाचे कर्तव्य असल्याचेही त्यांनी नमूद केले.
कार्यक्रमादरम्यान महिला सक्षमीकरण, समाजातील महिलांची भूमिका तसेच त्यांच्या अधिकारांबाबत विचारांची देवाणघेवाण करण्यात आली. उपस्थित महिलांनीही आपले अनुभव मांडत समाजातील महिलांच्या वाढत्या सहभागावर प्रकाश टाकला.
कार्यक्रमाचे सुत्रसंचालन शारोन तांद्रा यांनी केले, तर आभार प्रदर्शन श्रीमती मयुरी डोंगरे यांनी केले.
हा कार्यक्रम यशस्वी करण्यासाठी एच.एम.एस. संघटनेचे क्षेत्रीय पदाधिकारी विकास सोनटक्के, क्षेत्रीय कल्याण समितीचे डी.पी. दब्बवार, क्षेत्रीय जेसीसी समिती सदस्य जुबेर अहमद, घुग्घुस उपक्षेत्रीय अध्यक्ष नंदकिशोर पाटील, सचिव मंगेश भोयर तसेच संघटनेचे इतर पदाधिकारी व सदस्य यांनी महत्त्वपूर्ण योगदान दिले. सर्वांच्या सामूहिक प्रयत्नांतून हा कार्यक्रम यशस्वीरित्या पार पडला.
