RCERTमध्ये गणेशोत्सवाच्या पार्श्वभूमीवर रक्तदान शिबिर
उत्सवाच्या आनंदासोबत सामाजिक बांधिलकी; प्राध्यापकांसह सुमारे ५० विद्यार्थ्यांचे रक्तदान
सुवर्ण भारत:शंकर महाकाली
चंद्रपूर : गणेशोत्सवाचा उत्साह आणि सामाजिक बांधिलकीचा संदेश यांचा सुरेख संगम साधत सरदार पटेल मेमोरियल सोसायटी (ट्रस्ट) संचालित राजीव गांधी कॉलेज ऑफ इंजिनिअरिंग, रिसर्च अँड टेक्नॉलॉजी (RCERT), चंद्रपूर येथे रक्तदान शिबिराचे आयोजन करण्यात आले. गणेशोत्सव समितीच्या वतीने १४ ते १८ सप्टेंबरदरम्यान आयोजित गणेशोत्सवाच्या पार्श्वभूमीवर झालेल्या या उपक्रमाला विद्यार्थ्यांसह प्राध्यापकांचा उत्स्फूर्त प्रतिसाद मिळाला. प्राध्यापकांसह सुमारे ५० विद्यार्थ्यांनी रक्तदान करून सामाजिक बांधिलकी जपली.
महाविद्यालय परिसरात गणेशोत्सवानिमित्त आकर्षक सजावट करण्यात आली असून, पारंपरिक भारतीय संस्कृती आणि आधुनिक शैक्षणिक वातावरणाचा सुंदर मिलाफ साधण्यात आला आहे. उत्सवाच्या या वातावरणात केवळ धार्मिक व सांस्कृतिक कार्यक्रमांपुरते मर्यादित न राहता विविध सामाजिक आणि विद्यार्थीहिताचे उपक्रम राबविण्यात येत आहेत.
कमलादेवी दीक्षित चॅरिटेबल ट्रस्टच्या पुढाकाराने आयोजित करण्यात आलेल्या रक्तदान शिबिरासाठी ‘Give Blood, Give Hope, Together We Save Lives’ हा मानवतावादी संदेश देण्यात आला. गरजू रुग्णांना वेळेवर रक्त उपलब्ध व्हावे आणि तरुणांमध्ये रक्तदानाविषयी जनजागृती व्हावी, या उद्देशाने शिबिर घेण्यात आले.
यावेळी सरदार पटेल मेमोरियल सोसायटीचे अध्यक्ष विनोद दत्तात्रेय तसेच महाविद्यालयाचे प्राचार्य डॉ. अनिल चिताडे उपस्थित होते. त्यांनी रक्तदान करणाऱ्या विद्यार्थी व प्राध्यापकांचे कौतुक केले. विद्यार्थ्यांनी शिक्षणासोबतच सामाजिक उपक्रमांमध्ये सक्रिय सहभाग घेऊन समाजाप्रती आपली जबाबदारी पार पाडावी, असे आवाहन त्यांनी केले.
या रक्तदान शिबिरासाठी डॉ. हेडगेवार ब्लड सेंटर, नागपूर यांचे सहकार्य लाभले. रक्तदान करणाऱ्या विद्यार्थ्यांनी उत्स्फूर्त सहभाग नोंदवत मानवतेचा संदेश कृतीतून अधोरेखित केला. गणेशोत्सवाच्या निमित्ताने राबविण्यात आलेल्या या उपक्रमामुळे महाविद्यालय परिसरात सामाजिक जाणीवेचे वातावरण निर्माण झाले.
शिबिराच्या यशस्वी आयोजनासाठी डॉ. धनंजय डुंबेरे, डॉ. अमित आक्केवार, डॉ. नितीन जानवे, प्रा. आनंद डोनाल्ड, डॉ. माधवी साडू, प्रा. महेश डुंबेरे, प्रा. निखिल दुबे, प्रा. आदित्य आंबटकर आणि रूपक कामडी यांनी विशेष परिश्रम घेतले.
गणेशोत्सवाच्या उत्साहात रक्तदानासारख्या सामाजिक उपक्रमाला मिळालेला उत्स्फूर्त प्रतिसाद हा RCERTमधील विद्यार्थ्यांच्या सामाजिक जाणीवेचे सकारात्मक उदाहरण ठरला. ‘रक्तदान हेच जीवनदान’ या संदेशाला प्रत्यक्ष कृतीची जोड देत विद्यार्थ्यांनी समाजाप्रती असलेली बांधिलकी अधोरेखित केली.
