बल्लारपूर विकोलिनच्या सेवानिवृत्त कामगाराची आंतरराष्ट्रीय स्पर्धेत चमक; मुन्ना कुडे यांची तीन पदकांची कमाई
सुवर्ण भारत :शंकर महाकाली(संपादक)
बल्लारपूर: बल्लारपूर शहरासाठी अभिमानाची बाब ठरावी अशी उल्लेखनीय कामगिरी बल्लारपूर – गौरी येथील वेस्टर्न कोलफिल्ड्स लिमिटेड (WCL) चे सेवानिवृत्त कामगार नारायण उर्फ मुन्ना कुडे यांनी केली आहे. थायलंडमध्ये नुकत्याच पार पडलेल्या आंतरराष्ट्रीय अॅथलेटिक्स स्पर्धेत दमदार प्रदर्शन करत त्यांनी तीन पदके पटकावत देशासह परिसराचे नाव उज्ज्वल केले आहे. त्यांच्या या यशामुळे बल्लारपूरसह संपूर्ण परिसरात आनंदाचे वातावरण निर्माण झाले आहे.
थायलंड येथे आयोजित अॅथलेटिक्स स्पर्धेत विविध देशांतील खेळाडूंनी सहभाग घेतला होता. या स्पर्धेत मुन्ना कुडे यांनी उत्कृष्ट खेळाचे दर्शन घडवत 400 मीटर रिले स्पर्धेत रौप्यपदक पटकावले. त्यानंतर हायजंप स्पर्धेतही त्यांनी शानदार कामगिरी करत आणखी एक रौप्यपदक आपल्या नावावर केले. तसेच गोळाफेक (शॉटपुट) स्पर्धेत कांस्यपदक मिळवत त्यांनी तिहेरी यश संपादन केले. त्यांच्या या यशस्वी कामगिरीमुळे उपस्थित प्रेक्षक आणि क्रीडाप्रेमींनी त्यांचे कौतुक केले.
विशेष म्हणजे सेवानिवृत्तीनंतरही मुन्ना कुडे यांनी क्रीडाप्रती असलेली आवड आणि जिद्द कायम ठेवली आहे. नियमित सराव, मेहनत आणि आत्मविश्वासाच्या जोरावर त्यांनी आंतरराष्ट्रीय पातळीवर यश संपादन करत तरुणांसमोर एक आदर्श निर्माण केला आहे. वय ही केवळ संख्या असते आणि जिद्द व चिकाटीच्या बळावर कोणतीही गोष्ट साध्य करता येते, हे त्यांनी आपल्या कामगिरीतून दाखवून दिले आहे.
मुन्ना कुडे यांच्या या यशाबद्दल बल्लारपूर परिसरातील क्रीडाप्रेमी, मित्रपरिवार तसेच नातेवाईकांकडून अभिनंदनाचा वर्षाव होत आहे. स्थानिक नागरिकांनीही त्यांच्या कामगिरीचा अभिमान व्यक्त करत त्यांना पुढील वाटचालीसाठी शुभेच्छा दिल्या.
त्यांच्या या यशामुळे परिसरातील तरुण खेळाडूंना मोठी प्रेरणा मिळणार असून भविष्यात अधिकाधिक खेळाडूंनी राष्ट्रीय आणि आंतरराष्ट्रीय स्तरावर चमक दाखवावी, अशी अपेक्षा व्यक्त केली जात आहे. मुन्ना कुडे यांनी मिळवलेली ही कामगिरी बल्लारपूरसाठी गौरवास्पद ठरली आहे.
