• 
वरोरा पोलिसांची धडक कारवाई; बकरे चोरीचा २४ तासांत छडा
• पाच बकऱ्यांसह ५ लाख ७० हजारांचा मुद्देमाल जप्त; तीन आरोपी ताब्यात
वरोरा, दि. २९ ऑगस्ट : मजरा (रै.) येथील गोठ्यातून चोरीस गेलेल्या पाच बकऱ्यांचा वरोरा पोलिसांनी अवघ्या २४ तासांत शोध घेत चोरीचा छडा लावला. या कारवाईत तीन संशयित आरोपींना ताब्यात घेण्यात आले असून, त्यांच्याकडून चोरीस गेलेल्या पाच बकऱ्यांसह एकूण ५ लाख ७० हजार रुपये किमतीचा मुद्देमाल जप्त करण्यात आला आहे.
दि. २८ ऑगस्ट २०२६ रोजी फिर्यादी किशोर अशोक कोल्हे, रा. मजरा (रै.), ता. वरोरा, जि. चंद्रपूर यांनी वरोरा पोलीस ठाण्यात तक्रार दिली होती. त्यांच्या गोठ्यात बांधलेल्या पाच बकऱ्या रात्रीच्या सुमारास अज्ञात व्यक्तीने चोरून नेल्या होत्या. चोरीस गेलेल्या बकऱ्यांची किंमत सुमारे २५ हजार रुपये होती. याप्रकरणी वरोरा पोलीस ठाण्यात गुन्हा क्र. ९२१/२०२६, कलम ३०३(२), भारतीय न्याय संहिता (भा. न्या. सं.) २०२३ अन्वये गुन्हा दाखल करण्यात आला.
गुन्हा दाखल होताच वरोरा पोलिसांच्या तपास पथकाने घटनास्थळी धाव घेत परिसराची पाहणी केली. तसेच महामार्गालगत असलेल्या सीसीटीव्ही कॅमेऱ्यांची तपासणी करून गोपनीय माहितीच्या आधारे अज्ञात आरोपींचा शोध सुरू केला. तपासादरम्यान सुरज शिवगीरी सोळकी (वय २७), रा. इंदिरा नगर, अयोध्या नगर, चंद्रपूर; खुबलाल हिरासिंग ठाकूर (वय २५), रा. संजय नगर, दुर्गा वार्ड, चंद्रपूर; आणि राकेश राजेंद्र महतो (वय ३८), रा. शाम नगर, आंबेडकर चौक, बंगाली कॅम्प, चंद्रपूर यांना ताब्यात घेण्यात आले.
पोलिसांनी केलेल्या चौकशीत आरोपींनी गुन्ह्याची कबुली दिल्याचे प्रेस नोटमध्ये नमूद करण्यात आले आहे. आरोपींकडून चोरीस गेलेल्या पाच बकऱ्या (किंमत २५ हजार रुपये), स्वीफ्ट डिझायर कार क्र. एमएच १२ एफयू ८८१९ (किंमत ५ लाख रुपये) आणि होंडा मोटारसायकल क्र. एमएच ३४ सीसी ४३५४ (किंमत ४५ हजार रुपये) असा एकूण ५ लाख ७० हजार रुपयांचा मुद्देमाल जप्त करण्यात आला.
कष्टाने वाढविलेल्या बकऱ्या अवघ्या २४ तासांत परत मिळाल्याने फिर्यादी किशोर कोल्हे यांनी वरोरा पोलिसांच्या तत्परता, मेहनत आणि प्रभावी कारवाईबद्दल समाधान व्यक्त केले.
ही कारवाई पोलीस अधीक्षक आयुष नोपानी, अपर पोलीस अधीक्षक ईश्वर कातकरे, उपविभागीय पोलीस अधिकारी संतोष बाकल आणि प्रभारी अधिकारी ओमप्रकाश सोनटक्के यांच्या मार्गदर्शनाखाली सहाय्यक पोलीस उपनिरीक्षक शरद भस्मे, पोलीस उपनिरीक्षक मनीष तालेवार तसेच पोलीस कर्मचारी सुखराज यादव, अमोल नवघरे, प्रशांत नागोसे, महेश गावतुरे, सौरभ कुलते, विशाल राजुरकर आणि मनोज ठाकरे यांच्या विशेष पथकाने केली.
…….
