तुकूममधील एकता चौकात दहिहंडी उत्सव उत्साहात संपन्न; ‘गोविंदा रे गोपाळा’च्या जयघोषाने परिसर दुमदुमला
सुवर्ण भारत: शंकर महाकाली
चंद्रपूर : शहरातील तुकूम परिसरातील प्रभाग क्रमांक ५ मधील एकता चौक येथे ५ सप्टेंबर रोजी सायंकाळी ७ वाजता गोकुळाष्टमी निमित्त आयोजित भव्य दहिहंडी उत्सव अत्यंत उत्साहात आणि दणक्यात पार पडला. स्थानिक नगरसेवक अभिषेक डोईफोडे यांच्या वतीने या सोहळ्याचे आयोजन करण्यात आले होते. ‘गोविंदा रे गोपाळा’च्या जयघोषात आणि ढोल-ताशांच्या गजरात झालेल्या या उत्सवाने संपूर्ण तुकूम परिसरात गोकुळाष्टमीचा अस्सल आनंद उजळून निघाला होता.
मान्यवरांची प्रमुख उपस्थिती आणि कौतुक
या दहिहंडी उत्सवाला राज्याचे माजी मंत्री तथा ज्येष्ठ आमदार सुधीर मुनगंटीवार, चंद्रपूरचे आमदार किशोर जोरगेवार, रामनगर पोलीस ठाण्याच्या पोलीस निरीक्षक प्रभावती एकुरके, नगरसेवक सचिन कत्याल, नगरसेविका संगीता अमृतकर, नगरसेवक रवी लोनकर, नगरसेविका पुष्पा उराडे, नगरसेविका संजीवनी वासेकर, नगरसेविका सुनंदा धोबे, पसायदान ज्येष्ठ नागरिक संघाचे अध्यक्ष प्रकाश गुंडावार यांच्यासह परिसरातील प्रतिष्ठित व्यापारी, डॉक्टर मंडळी आणि अनेक मान्यवर आवर्जून उपस्थित होते.
यावेळी उपस्थितांशी संवाद साधताना आमदार सुधीर मुनगंटीवार व आमदार किशोर जोरगेवार यांनी नगरसेवक अभिषेक डोईफोडे यांच्या माध्यमातून प्रभागात सुरू असलेल्या विविध विकासकामांचे आणि त्यांच्या सामाजिक उपक्रमांचे विशेष कौतुक केले.
उत्सवात परिसरातील बालगोपालांसह विविध गोविंदा पथकांनी अतिशय उत्स्फूर्तपणे सहभाग घेतला. उंचच उंच मानवी थरांवर थर रचत दहिहंडी फोडण्यासाठी तरुणांमध्ये आणि गोविंदा पथकांमध्ये प्रचंड उत्साह व चुरस पाहायला मिळाली. शेकडो नागरिकांच्या उपस्थितीत आणि टाळ्यांच्या कडकडाटात पार पडलेल्या या थरारक स्पर्धेत, बाबुपेठ येथील ‘शितलामाता बालगोपाळ मंडळाच्या’ गोविंदा पथकाने बाजी मारत प्रथम क्रमांक पटकावला. या यशस्वी पथकाला आयोजकांच्या वतीने आकर्षक रोख पारितोषिक आणि सन्मानचिन्ह देऊन गौरविण्यात आले.
चोख पोलीस बंदोबस्त आणि नागरिकांची प्रचंड गर्दी
हा भव्य सोहळा डोळ्यात साठवण्यासाठी तुकूम परिसरासह चंद्रपूर शहरातून आलेल्या शेकडो नागरिकांनी एकता चौकात मोठी गर्दी केली होती. उत्सवाच्या वातावरणात कुठेही गालबोट लागू नये आणि कायदा व सुव्यवस्था अबाधित राहावी, यासाठी रामनगर पोलीस ठाण्याच्या पोलीस निरीक्षक प्रभावती एकुरके यांच्या मार्गदर्शनाखाली पोलिसांनी परिसरात चोख बंदोबस्त ठेवला होता.
आयोजनाचे यश
कार्यक्रम यशस्वी करण्यासाठी अमन डोईफोडे, विनायक डोइफोडे, मेगा बंडेवार, संजय मासीरकर यांच्यासह वीर साहस बहुउद्देशीय व शैक्षणिक संस्था, चंद्रपूरच्या सर्व पदाधिकाऱ्यांनी आणि कार्यकर्त्यांनी विशेष परिश्रम घेतले. रात्री उशिरापर्यंत चाललेल्या या उत्सवाने चंद्रपूरकरांच्या मनात एक वेगळाच उत्साह निर्माण केला.
