Chandrapur city@ news
• आ.किशोर जोरगेवारांच्या मध्यस्थी नंतर जिल्हा सामान्य रुग्णालयातील शिकाऊ डॉक्टरांचे आंदोलन मागे
•रुग्णालयातील डाॅक्टरांना मिळणार पोलिस सुरक्षा
✍️किरण घाटे
सुवर्ण भारत:किरण घाटे(उपसंपादक)
चंद्रपूर:रुग्णालयात रुग्णांच्या नातलगांनी डॉक्टराला मारहाण केल्याच्या निषेधार्थ शिकाऊ डॉक्टरांनी जिल्हा सामान्य रुग्णालयात आंदोलन सुरु केले होते. दरम्यान चंद्रपूरचे आ. किशोर जोरगेवार यांनी आंदोलनकर्त्यां डॉक्टरांची भेट घेत त्यांना रुग्णालयात अधिक पोलिस सुरक्षा देण्यात येणार असल्याचे सांगीतले आहे. यावेळी आमदार जोरगेवार यांच्या मध्यस्थी नंतर डॉक्टरांनी आपले आंदोलन मागे घेतले आहे. तर दुसरीकडे वेतन अदा न झाल्याने डॉक्टरांच्या दुस-या संघटनेने सुरु केलेले आंदोलन सुरुच आहे. याबाबतही वरिष्ठ पातळीवर चर्चा करणार असल्याचे आमदार जोरगेवार यांनी म्हटले आहे.
बुधवारी आ.जोरगेवार यांनी जिल्हा सामान्य रुग्णालयात जाऊन आंदोलनकरत असलेल्या डॉक्टरांची भेट घेत त्यांच्याशी चर्चा केली. नंतर लगेच त्यांनी रुग्णालय आणि पोलिस प्रशासन यांच्या अधिका-यांची बैठक घेत डॉक्टरांना सुरक्षा देण्याच्या सूचना केल्यात. या बैठकीत शासकीय वैद्यकीय महाविद्यालयाचे अधिष्ठाता डॉ. मिलींद फुलपाटील, वैद्यकीय अधिक्षक डॉ. निवृत्ती जिवने, उप वैद्यकीय अधिक्षक भुषण नैताम, प्रा. डॉ मिलींद कांबळे, प्रा. डॉ प्रशांत उईक, शहर पोलिस ठाण्याचे पालिस निरिक्षक राजपूत आदींची उपस्थिती होती. जिल्हा सामान्य रुग्णालयातील शिकाऊ डॉक्टराला रुग्णांच्या नातलगांनी मारहाण केल्याचा प्रकार घडला होता.
या प्रकरणी शहर पोलिस ठाण्यात तक्रार दाखल करण्यात आली आहे. पोलिसांनीही या प्रकरणी कारवाई केली आहे. मात्र या घटनेच्या विरोधात जिल्हा सामान्य रुग्णालयातील डॉक्टरांनी रुग्णालय परिसरात आंदोलन सुरु केले होते. याचा परिणाम आरोग्य सेवेवर दिसुन आला होता. याची माहिती मिळताच आमदार जोरगेवार यांनी जिल्हा सामान्य रुग्णालयात जाउन डॉक्टरांशी चर्चा केली.
येथे पुर्ण वेळ सहाय्य पोलिस दर्जाचा अधिकारी तैणात ठेवण्यात यावा, ओपीडी मध्ये दोन पोलिसांची तैनाती ठेवण्यात यावी डॉक्टरांना सुरक्षा देण्यात यावी अशा सुचना आमदार जोरगेवार यांनी पोलिस प्रशासनाला केल्या आहे. तसेच यावेळी आमदार किशोर जोरगेवार यांनी जिल्हा पोलिस अधिक्षक रविंद्रसिंग परदेशी यांच्याशी दूरध्वनी वरुन चर्चा करत त्यांना संपूर्ण प्रकरणाची माहिती दिली आहे. त्यांनतर डाॅक्टरांनी आपले आंदोलन मागे घेतले आहे. त्यामुळे आरोग्य सेवा पुन्हा सुरळीत झाली आहे.
