#Ghugus
• लॉयड्स इन्फिनाईट फाउंडेशन कडून शैक्षणिक वस्तूंचे वाटप
• जिल्हा परिषद शाळेतील विद्यार्थ्यांच्या भवितव्यासाठी महत्त्वपूर्ण पाऊल
सुवर्ण भारत पंकज : रामटेके
सहाय्यक जिल्हा प्रतिनीधी, चंद्रपूर
#घुग्घुस : चंद्रपूर जिल्ह्यातील घुग्घुस परिसरातील उसगाव, घुग्घुस, म्हातारदेवी, बेलसणी, मुरसा, शेणगाव, पांढरकवडा, वढा, नकोडा, धानोरा, पिंपरी व अंतुर्ला येथील जिल्हा परिषद शाळेत लॉयड्स इन्फिनाईट फाउंडेशनच्या वतीने एक स्तुत्य उपक्रम राबवण्यात आला. शाळेतील विद्यार्थ्यांच्या गरजा आणि पुढील शैक्षणिक वर्षाची तयारी लक्षात घेऊन त्यांना आवश्यक शैक्षणिक वस्तूंचे वाटप करण्यात आले. या उपक्रमामुळे विद्यार्थ्यांना शिक्षणासाठी प्रोत्साहन मिळेल आणि त्यांच्या पुढील वाटचालीस हातभार लागेल अशी अपेक्षा व्यक्त केली जात आहे.
या कार्यक्रमात एकूण २० जिल्हा परिषद शाळेतील १३०० विद्यार्थ्यांना शालेय बॅग, कंपास बॉक्स, वह्या (नोटबुक्स) आणि पाण्याची बाटली यांसारख्या अत्यंत उपयुक्त वस्तूंचे वाटप करण्यात आले. हे साहित्य विद्यार्थ्यांना केवळ शाळेत नियमित येण्यास प्रोत्साहित करेल असे नाही, तर त्यांना चांगल्या प्रकारे अभ्यास करण्यास मदत करेल. अनेकदा आर्थिक परिस्थितीमुळे विद्यार्थ्यांना शैक्षणिक साहित्य खरेदी करणे शक्य होत नाही. अशा परिस्थितीत लॉयड्स इन्फिनाईट फाउंडेशनने उचललेले हे पाऊल निश्चितच विद्यार्थ्यांसाठी दिलासादायक ठरले आहे.
या महत्त्वपूर्ण कार्यक्रमाचे उद्घाटन लॉयड्स मेटल्स अँड एनर्जी लिमिटेडचे वरिष्ठ उपाध्यक्ष प्रशांत पुरी यांच्या हस्ते करण्यात आले. पुरी यांनी विद्यार्थ्यांशी संवाद साधून त्यांना शिक्षणाचे महत्त्व समजावून सांगितले आणि उज्ज्वल भविष्यासाठी शुभेच्छा दिल्या. कार्यक्रमाच्या अध्यक्षस्थानी जिल्हा परिषद शाळेचे केंद्र प्रमुख अनिल डगमवार होते. डगमवार यांनी लॉयड्स इन्फिनाईट फाउंडेशनचे आभार मानले आणि अशा उपक्रमांमुळे ग्रामीण भागातील विद्यार्थ्यांच्या शिक्षणाला चालना मिळते असे मत व्यक्त केले.
याप्रसंगी प्रमुख पाहुणे म्हणून विकास वर्मा, संदीपान बाकची ,सहायक महाप्रबंधक विद्या पाल उपस्थित होत्या. तसेच उपव्यवस्थापक दिपक साळवे ,सर्व गावातील सरपंच उपसरपंच शाळा व्यवस्थापन समितीचे अध्यक्ष त्यांच्यासह शाळेचे मुख्याध्यापक, सर्व शिक्षकवृंद, ग्रामपंचायतीचे सदस्य आणि शाळा व्यवस्थापन समितीचे सभासद मोठ्या संख्येने उपस्थित होते. या सर्व मान्यवरांच्या उपस्थितीमुळे कार्यक्रमाला एक वेगळीच उंची प्राप्त झाली आणि सामाजिक बांधिलकीचा संदेश दिला गेला.
लॉयड्स इन्फिनाईट फाउंडेशनने विद्यार्थ्यांच्या शिक्षणासाठी उचललेले हे पाऊल निश्चितच कौतुकास्पद आहे. अशा सामाजिक उपक्रमांमुळे विद्यार्थ्यांमध्ये शिक्षणाबद्दलची आवड वाढते आणि त्यांना चांगले नागरिक बनण्यास मदत होते. या वाटपामुळे विद्यार्थ्यांना पुढील शैक्षणिक वर्षासाठी तयारी करण्यास बरीच मदत होणार असून, त्यांच्या चेहऱ्यावर दिसलेला आनंद हीच या कार्यक्रमाची खरी पावती होती. भविष्यातही लॉयड्स इन्फिनाईट फाउंडेशन असेच उपक्रम राबवून समाजाच्या विकासासाठी योगदान देईल अशी आशा आहे.
या संपूर्ण कार्यक्रमाच्या यशस्वीतेसाठी लॉयड्स इन्फिनाईट फाउंडेशन चे अनुराग मते, स्नेहा रणदिवे, श्रीरंग पोतराजे शीतल कौरासे यांनी प्रयत्न केले
