🟧शशीच्या स्पर्शात🟫

🟧शशीच्या स्पर्शात🟫

स्वर्ण भारत :किरण घाटे (विदर्भ विशेष प्रतिनिधी)

चंद्राच्या मोहाने
मी चांदनी मोहरली,
भावनांच्या लहरींनी
मनात लाज धरली.

रात्र झाली साक्षी
या गोड क्षणांची,
स्वप्नांनी सजली वाट
चांदण्यांच्या दुनियेची.

चांदण्यांच्या स्पर्शाने
ओठांवर हास्य फुलले,
वाऱ्याच्या झुळुकीत
मन माझे हरवले.

कल्पनेने विणली जादू
शांततेच्या छायेत,
स्वप्नांचे महाल उभे
त्या यामिनीच्या कवेत.

नजरेस नजर भेटता
डोळ्यांत आली लाज,
मनात वाजली गाणी
प्रीतीचा चढला साज.

निशा साक्षी होती
या भावनांच्या नात्याची,
मनात उमटल्या लहरी
त्या निशानाथाच्या प्रीतीची.

ओघळते चांदणी मी
शशीच्या स्पर्शात विरते,
गंध प्रीतीचा हळूवार
स्वप्नातही दरवळते.

🟡🔶वैशाली राऊत🔶🟠
सहज सुचलं सदस्य नागपूर