आमदार सुधीर मुनगंटीवार यांनी केले नुपूरचे कौतुक व अभिनंदन!
नुपूर मोडकचा मुंबईत डंका; ‘बेस्ट एक्झिबिशन इन पेंटिंग’ पुरस्काराने सन्मानित!
चंद्रपूर -किरण घाटे
कलेच्या विस्तीर्ण पटावर आपल्या कल्पकतेचे नवनवीन रंग उधळत, चंद्रपूरची सुकन्या नुपूर दिलीप मोडक हिने मुंबईच्या मायानगरीत यशाचे एक सुवर्णशिखर सर केले आहे. अमिटी युनिव्हर्सिटी, मुंबई येथे आयोजित ‘बॅचलर ऑफ फाईन आर्ट’च्या अंतिम वर्षाच्या कलाप्रदर्शनात नुपूर हिच्या कुंचल्यातून साकारलेल्या अप्रतिम चित्रकृतींनी रसिकांना भुरळ घातली. तिच्या या विहंगम कलाविष्काराला मानाचा ‘बेस्ट एक्झिबिशन इन पेंटिंग’ हा पुरस्कार देऊन सन्मानित करण्यात आले, ज्यामुळे चंद्रपूर जिल्ह्याचे नाव कलाजगतात अभिमानाने उज्ज्वल झाले आहे.
नुपूरने कॅनव्हासवर उमटवलेले रंग तिच्या संवेदनशील मनाचे आणि अथक परिश्रमांचे बोलके प्रतिबिंब ठरले. तिच्या या दैदिप्यमान यशोगाथेची दखल घेत महाराष्ट्राचे माजी मंत्री सुधीर मुनगंटीवार यांनी नुपूरचे विशेष कौतुक केले. “मुंबईसारख्या स्पर्धात्मक वातावरणात आपल्या कलेच्या जोरावर तिने मिळवलेला हा सन्मान तिच्या उज्ज्वल भविष्याची सुंदर नांदी आहे,” अशा शब्दांत त्यांनी तिला शुभेच्छा दिल्या.
या सोहळ्याला नुपूरची आई रंजू मोडक यांच्यासह तिचे संपूर्ण कुटुंब आणि कला क्षेत्रातील अनेक नामांकित मंडळी उपस्थित होती. आपल्या कन्येचा हा अभूतपूर्व गौरव पाहून तिच्या आईचे डोळे अभिमानाने आणि आनंदाश्रूंनी ओसंडून वाहत होते. नुपूरचे हे यश राज्यातील इतर तरुण कलाकारांसाठी एक नवी प्रेरणा ठरेल, यात शंका नाही.
