Chandrapur dist@ news
• शिवाजी मोघेंच्या निषेधार्थ तब्बल 10 हजार माना समाज बांधव उतरले रस्त्यावर
✍️किरण घाटे
सुवर्ण भारत:सहसंपादक
चंद्रपुर: माना जमातीचे वतीने माजी मंत्री शिवाजी मोघे यांनी केलेल्या असंविधानिक वक्तव्याच्या विरोधात माना जमातीच्या वतीने रविवारी एका भव्य निषेध मोर्चाचे आयोजन करण्यात आले होते. माना जमात ही प्रामुख्याने विदर्भातील जिल्ह्यामध्ये मोठ्या प्रमाणात वास्तव्यास असून ” माना ” ही स्वतंत्र आदिवासी जमात आहे. तिची स्वतंत्र धार्मिक, सामाजिक, सांस्कृतिक परंपरा आहे. केंद्र शासनाच्या अनुसूचित जमातीच्या यादीमध्ये माना हि जमात क्रमांक १८ वर नमूद आहे.
सन १९५५ मध्ये काका कालेलकर आयोगांनी “ माना “ जमातीला अनुसूचित जमातीचे सर्व अधिकार व हक्क बहाल केलेले आहे. मात्र नागपूर येथील “ आदिवासी क्षेत्रबंधन मुक्ती दिवस ” निमित्त जाहीर कार्यक्रमात माजी सामाजिक न्यायमंत्री शिवाजी मोघे यांनी आदिवासी माना जमाती बाबत ” हमारी सरकार आयी तो हायर पॉवर कमिशन नेमो, उसमे गलतीसे जो जो जातीया आयी उसमे जो गलतीसे एन्ट्री आयी है उसमे माना भी है. यह माना भी गलत है, यह गोंड माना उसके लिये है. सब माना के लिए नही है यह गलत है इसको निकाल डालो.
“अशा प्रकारचे असैविधांनिक वक्तव्य करून मा. सर्वोच्च न्यायालय यांनी दिलेल्या दि.०८/०३/२००६ च्या निर्णया विरुध्द असुन मा. सर्वोच्च न्यायालयाचे अपमान केलेला आहे. माना जमाती संबंधाने वारंवार असे वक्तव्य केल्या जात असते. त्यांचे हे विधान केवळ द्वेष भावना आणि आकसापोटी असून संपूर्ण माना जमातीचा अवमान केलेला आहे. त्यामुळे जमाती जमातीत तेढ निर्माण करून अशांतता व संभ्रम निर्माण होत आहे. यावर आळा घालण्यासाठी चंद्रपूर जिल्ह्यातील चिमूर तालुक्यातून १० हजार आदिवासी माना जमातीच्या बांधवांनी अप्पर जिल्हाधिकारी कार्यालय चिमूर येथे घडक मोर्चा नेऊन आपला निषेध व्यक्त केला.
नागपूर येथील जाहीर कार्यक्रमात माना जमातीचे विरोधात शिवाजी मोघे यांनी चुकीचे वक्तव्य केले त्यावेळी विरोधी पक्षनेते तथा आमदार विजय वडेटीवार, माजी आमदार नामदेव उसेंडी सुद्धा उपस्थित होते .या दोन्ही नेत्यांचे मतदारसंघात मोठ्या प्रमाणात माना जमातीचे वास्तव्य असून त्यांनीही चुकीच्या वक्तव्याचा विरोध केला नाही. याबाबतही जाहीर नाराजी व्यक्त केली जात आहे. त्यावेळी चिमूर तालुक्यातुन गावागावातील माना जमातीचे समाज बांधव मोठ्या संख्येने सहभागी झाले होते.
निवेदन देण्यापूर्वी उपस्थितांना आदिवासी माना जमात विद्यार्थी युवा संघटना महाराष्ट्र तालुका शाखा चिमूर माना आदिम जमात मंडळ मुंबई तालुका शाखा चिमूर, तसेच समन्वय समितीचे प्रतिनिधींची त्याचप्रमाणे सामाजिक कार्यकर्ते यांची भाषणे झाली. त्यानंतर प्रतिनिधी शिष्टमंडळांनी अप्पर जिल्हाधिकारी यांना निवेदन देवून शिवाजी मोघे माजी मंत्री यांच्यावर गुन्हा नोंदविण्यात यावा अशी मागणी केली भविष्यात माना जमातीचे विरोधी असे वक्तव्य केल्यास लोकशाही मार्गाने तीव्र लढा देण्यात येईल. यासाठी शासन व प्रशासन सर्वस्वी जबाबदार राहील असा इशारा समस्त आदिवासी माना जमात बांधवांनी दिला आहे.
