♦️◻️मयतीला ये पोरी ♦️
♦️◽नवनाथ सरोदे ,आंबी दुमाला
जमलं तर ये पोरी
बापाच्या मयतीला /
एकटी नको येऊ तू
नवराही आण सोबतीला //
बापा पेक्षा तोच तुला
जीव लावणारा दिसला गं /
पळून गेलीस म्हणूनच
बाप तुझ्यावर रूसला गं //
अठरा वर्ष सांभाळलय
तळ हाताच्या फोडावानी /
येऊ नव्हतं दिलं कधी
डोळ्यात तुझ्या पाणी //
जे जे मागायचीस पोरी
ते ते द्यायचा मी /
तुझीच हौस पुरवायला
भीक मागायचा मी //
बॅंकेत जाऊन बघ एकदा
लाखो रूपये तुझ्या नावावर /
तुझ्याच साठी कमवलेत पोरी
उदार होऊन जिवावर //
दोष तुझा नाय पोरी
दोष तर माझाच हाय /
तू कधी वयात आली
मलाच कळलं नाय //
चूक माझीच झाली
तुला शिकवली शाळा /
हुशार झाली म्हणून का
केसानं कापला गळा //
ये आता रडत बोंबलत
पप्पा पप्पा म्हणत /
सरणावर आपटून डोकं
बस आता कण्हत //
पोरी तुला जगातलं
सारं सुख मिळू दे /
तुझ्याच हातान मात्र
सरण माझं जळू दे //..