🟠⚪शाळेचा पहिला दिवस!

🟠⚪शाळेचा पहिला दिवस!

‼️किलबिलाट‼️

पुन्हा नव्याने किलबिलाट

बोलक्या झाल्या भिंती
तीच सुंदर पहाट उजाडली
आनंदात पाखरे नाहती

लाल रिबीनी लख्ख केल्या
विस्तवाची इस्त्री निळ्या पांढऱ्याला
तेल लावुनी भांग पाडता
ओघळणारी धार गालाला

जुना गणवेश नवा वाटे
शिवलेले दप्तर पाठीवरी
स्टीलच्या डब्यात कोरडा खाऊ
मधल्या सुट्टीत कमाल करी

फळा काळा स्वच्छ केला
अंगणात रांगोळीचा पडला सडा
अबोली ची फुले टेबलावर
स्वच्छ पाण्याने भरला घडा

घंटा वाजता जमले सारे
परिपाठासाठी रांग लागली
बाईची सूचना मिळता एका
साऱ्यांची कुजबुज तिथे थांबली

निरागस भाव आणुनी डोळे
पुसशी आज काय करूया नवे
कृती, खेळ, यात रमतारमता
वेळेचे ही भान न राहावे

शांत व्हारांडा, अंगण निपचिप
आतुर पावलांच्या आगमनाला
पिल्लांशिवाय घरट नाही
नव्याने अर्थ हा उमगला

⬛विद्या राजाराम शिनगारे
सहज सुचलं काव्यकुंज सदस्य