#Ballarpur
• गॅस सिलेंडर टंचाईवर वंचित बहुजन आघाडी आक्रमक
• जिल्हाधिकाऱ्यांना निवेदन, तीव्र आंदोलनाचा इशारा
सुवर्ण भारत : शंकर महाकाली (संपादक)
बल्लारपूर : राज्यासह देशभरात घरगुती गॅस सिलेंडरच्या टंचाईचा प्रश्न दिवसेंदिवस गंभीर होत चालल्याने सर्वसामान्य नागरिकांचे जनजीवन विस्कळीत होत आहे. या पार्श्वभूमीवर वंचित बहुजन आघाडीने प्रशासनाचे लक्ष वेधत आक्रमक भूमिका घेतली असून, तात्काळ उपाययोजना करण्याची मागणी केली आहे.
पक्षाचे राष्ट्रीय नेते बाळासाहेब आंबेडकर यांच्या आवाहनानुसार “नरेंद्र, कब मिलेगा सिलेंडर?” या घोषणेद्वारे महाराष्ट्रभर जनतेच्या भावना व्यक्त केल्या जात आहेत. वाढती महागाई आणि गॅस सिलेंडरचा अनियमित पुरवठा यामुळे नागरिक त्रस्त झाले असून, सरकारने याकडे गांभीर्याने लक्ष देण्याची गरज असल्याचेही यावेळी अधोरेखित करण्यात आले.
बल्लारपूर येथे महिला आघाडी तसेच शहर व तालुका पदाधिकाऱ्यांनी एकत्र येत तहसीलदारांमार्फत जिल्हाधिकाऱ्यांना सविस्तर निवेदन सादर केले. या निवेदनात गॅस सिलेंडरची निर्माण झालेली कृत्रिम तसेच नैसर्गिक टंचाई दूर करण्यासाठी ठोस आणि तातडीच्या उपाययोजना करण्याची मागणी करण्यात आली आहे. तसेच वितरण व्यवस्थेतील त्रुटी दूर करून नागरिकांना वेळेत आणि सुरळीत गॅस पुरवठा करण्याची आवश्यकता व्यक्त करण्यात आली.
निवेदनात नमूद केल्याप्रमाणे, अनेक भागांत ग्राहकांना वेळेवर गॅस सिलेंडर मिळत नसल्यामुळे मोठ्या प्रमाणावर गैरसोय होत आहे. महिलांना घरगुती कामकाजात अडचणी येत असून, काही ठिकाणी नागरिकांना तासन्तास रांगेत उभे राहावे लागत आहे. त्यामुळे प्रशासनाच्या दाव्यांमध्ये आणि प्रत्यक्ष परिस्थितीत मोठी तफावत असल्याचे चित्र समोर येत आहे.
दरम्यान, प्रशासनाकडून टंचाई नसल्याचे सांगितले जात असले तरी प्रत्यक्षात ग्राहकांना गॅससाठी लांबच लांब रांगा लावाव्या लागत असल्याचा विरोधाभास आंदोलनकर्त्यांनी स्पष्ट केला. या परिस्थितीमुळे नागरिकांमध्ये नाराजीचे वातावरण निर्माण झाले असून, त्वरित तोडगा न निघाल्यास आंदोलन तीव्र करण्याचा इशाराही देण्यात आला.
या वेळी शहराध्यक्ष उमेश कडू, महिला आघाडी तालुकाध्यक्ष नम्रता साव, शहराध्यक्षा रेखा पागडे, तालुकाध्यक्ष वाघाडे, युवा आघाडी शहराध्यक्ष शुभम नागापुरे, शहर महासचिव गौतम रामटेके, शहर संघटक राकेश पेटकर, ज्येष्ठ सल्लागार सत्यभामा भाले, देवराम नंदेश्वर, प्रजय देवगडे, गोविंदा वनकर, सतीश नगराळे, रवी मेश्राम यांच्यासह अनेक पदाधिकारी व कार्यकर्ते मोठ्या संख्येने उपस्थित होते.
गॅस पुरवठा सुरळीत करण्यासाठी प्रशासनाने तातडीने ठोस पावले उचलावीत, अन्यथा वंचित बहुजन आघाडीच्या वतीने पुढील काळात व्यापक आणि तीव्र आंदोलन छेडण्यात येईल, असा स्पष्ट इशारा यावेळी देण्यात आला.
