“चंद्रपूरचा राजा” मंडळाचा प्रशासकीय अधिकारी व लोकप्रतिनिधींना सन्मान; कृतज्ञतेचा अनोखा उपक्रम
सुवर्ण भारत :पंकज रामटेके
सहाय्यक जिल्हा प्रतिनिधी, चंद्रपूर
चंद्रपूर : सामाजिक, सांस्कृतिक आणि धार्मिक क्षेत्रात सातत्याने उल्लेखनीय कार्य करणाऱ्या “चंद्रपूरचा राजा” जटपूरा युवक गणेश मंडळाने पुन्हा एकदा समाजाप्रती असलेली बांधिलकी अधोरेखित करत प्रेरणादायी उपक्रम राबविला. जिल्ह्यात नव्याने पदभार स्वीकारलेल्या प्रशासकीय अधिकारी व लोकप्रतिनिधींचा सन्मान करून मंडळाने कृतज्ञता, आदर आणि सहकार्याचा सकारात्मक संदेश दिला.
९ एप्रिल २०२६ रोजी जिल्हाधिकारी पदाची सूत्रे हाती घेतल्यानंतर सौ. वसुमना पंत यांच्या कार्यशैलीबद्दल नागरिकांमध्ये मोठ्या अपेक्षा व्यक्त होत आहेत. त्यांच्या नेतृत्वाखाली जिल्ह्याच्या विकासाला नवे गतीमान लाभेल, या विश्वासाने मंडळाच्या वतीने त्यांचा विशेष सन्मान करण्यात आला.
यावेळी महानगरपालिकेचे आयुक्त अकुनूरी नरेश, महापौर संगिताताई राजेंद्र खांडेकर, उपमहापौर प्रशांत दानव तसेच स्थायी समिती सभापती मनस्वी संदीप गिऱ्हे यांचाही सन्मानपूर्वक गौरव करण्यात आला. शहराच्या सर्वांगीण प्रगतीसाठी हे मान्यवर निष्ठेने कार्य करतील, असा विश्वास व्यक्त करत त्यांना शुभेच्छा देण्यात आल्या.
सन्मान सोहळ्यात मंडळाच्या वतीने शाल, “चंद्रपूरचा राजा”ची प्रतिमा, वृक्षरोप आणि शुभेच्छापत्र देऊन मान्यवरांचा सत्कार करण्यात आला. हा उपक्रम केवळ औपचारिक न ठरता समाजाच्या मनातील आदर व कृतज्ञतेची भावना व्यक्त करणारा ठरला.
विशेष म्हणजे, सर्व मान्यवरांना त्यांच्या कार्यालयात जाऊन प्रत्यक्ष भेट घेऊन सन्मानित करण्यात आले. त्यामुळे कार्यक्रमाला अधिक आत्मीयता प्राप्त झाली असून प्रशासन व नागरिक यांच्यातील संवाद अधिक दृढ होण्यास मदत झाली.
या प्रसंगी मंडळाचे अध्यक्ष दिपक बेले यांच्यासह दिलीप कपूर, माजी नगरसेवक देवेंद्र बेले, बालकृष्ण वैरागडे, महेश बेले, निश्चल बेले, शैलेश जुमडे, मनन बेले, राहुल बेले, तुषार लांजेवार तसेच सर्व पदाधिकारी व सदस्य मोठ्या संख्येने उपस्थित होते. यामधून संघटितपणा आणि शहराच्या विकासासाठी योगदान देण्याची भावना स्पष्टपणे दिसून आली.
“चंद्रपूरचा राजा” मंडळ हे केवळ गणेशोत्सवापुरते मर्यादित नसून वर्षभर विविध सामाजिक व धार्मिक उपक्रम राबवत असते. आकर्षक गणेशमूर्ती व भव्य सजावटीसोबतच रक्तदान शिबिरे, गणेश जयंती, रामनवमी व हनुमान जयंतीनिमित्त महाप्रसाद वितरण असे उपक्रम मंडळ सातत्याने आयोजित करते.
सामाजिक बांधिलकी जपत कार्य करणारे हे मंडळ आज चंद्रपूर शहरात विश्वासार्ह व प्रेरणादायी संस्था म्हणून ओळखले जाते. या उपक्रमामुळे प्रशासन व नागरिक यांच्यातील स्नेहबंध अधिक दृढ होऊन शहराच्या विकासाला नवी दिशा मिळेल, अशी अपेक्षा व्यक्त होत आहे.
