चामोर्शीच्या प्रा. सुनंदा पाटील यांना सर्वद फौंडेशनचा स्टार साहित्यिक पुरस्कार प्राप्त
चंद्रपूर -किरण घाटे
–
चामोर्शी येथील स्व. बाळासाहेब दीक्षित यांची कन्या प्रा. सुनंदा गिरीश पाटील यांना सर्वद फौंडेशन मुंबई चा सन्मानजनक असा “स्टार लेखिका पुरस्कार ” बोरिवली पश्चिम मुंबई येथे प्रदान करण्यात आला .
याप्रसंगी सर्वद फौंडेशनच्या डॉ. सुचिता पाटील सह सुप्रसिद्ध अभिनेते आणि दिग्दर्शक अरुण नलावडे , डॉ. चंद्रशेखर देशमुख , डॉ. मोहन सालेकर , मिलिंद भोसुरे अशी दिग्गज मंडळी उपस्थित होती. उपवस्त्र , सन्मानपत्र , सन्मानचिन्ह असे या पुरस्काराचे स्वरूप आहे. समाजातील काही नामवंत व्यक्तींची निवड करून हे पुरस्कार देण्यात आले.
प्रा. सुनंदा पाटील या ज्येष्ठ साहित्यिक आहेत . कवयित्री , गझलकार , कथालेखिका , कादंबरीकार म्हणूनही त्या परिचित आहेत . गझलनंदा या नावाने त्या गेली ५० वर्षे गझललेखनाचे कार्य करीत आहेत .
कवितेच्या अनेक लयबद्ध / वृत्तबद्ध प्रकारात त्या कविता लेखन करतात . तसेच लेखनाच्या कार्यशाळाही घेतात . साहित्यक्षेत्रात आजवर अनेक पुरस्कारांनी त्या सन्मानीत झालेल्या आहेत . सर्व स्तरातून त्यांचे अभिनंदन केले जात आहे .
