घुग्घुस : लोकमान्य टिळक पुण्यतिथी आणि लोकशाहीर अण्णाभाऊ साठे जयंती निमित्त अभिवादन
घुग्घुस : स्वातंत्र्यलढ्याचे प्रेरणास्थान लोकमान्य बाळ गंगाधर टिळक यांच्या 106 व्या पुण्यतिथी आणि लोकशाहीर साहित्यरत्न अण्णाभाऊ साठे यांच्या 105 व्या जयंतीनिमित्त आ. किशोर जोरगेवार जनसंपर्क कार्यालय व भारतीय जनता पार्टी घुग्घुस यांच्या संयुक्त विद्यमाने अभिवादन व माल्यार्पण कार्यक्रमाचे आयोजन करण्यात आले.
स्वराज्याचा मंत्र आणि प्रबोधनाचा संदेश एकाच व्यासपीठावर
कार्यक्रमाची सुरुवात दोन्ही महापुरुषांच्या प्रतिमेला पुष्पहार अर्पण करून करण्यात आली. यावेळी उपस्थित पदाधिकारी आणि कार्यकर्त्यांनी एकाच स्वरात “स्वराज्य हा माझा जन्मसिद्ध हक्क आहे आणि तो मी मिळवणारच” हा टिळकांचा क्रांतिकारी मंत्र आणि अण्णाभाऊंचा “माझा समाज जागा झाला पाहिजे” हा प्रबोधनाचा संदेश घुमवून विनम्र अभिवादन केले.
याप्रसंगी मान्यवरांनी लोकमान्य टिळक यांच्या कार्याचा गौरव केला. शिक्षण, सामाजिक सुधारणा आणि सार्वजनिक गणेशोत्सव व शिवजयंतीच्या माध्यमातून त्यांनी जनजागृती केली. त्यांनी देशाला स्वराज्याचा मंत्र दिला आणि स्वातंत्र्य चळवळीला नवी दिशा दिली, असे मत व्यक्त करण्यात आले.
राष्ट्रीय एकात्मता आणि सामाजिक समतेचा वारसा पुढे नेण्याचा निर्धार
लोकशाहीर अण्णाभाऊ साठे यांच्या साहित्याचा गौरव करताना वक्त्यांनी सांगितले की, अण्णाभाऊंनी आपल्या लावणी, पोवाडे आणि कादंबऱ्यांमधून वंचित-शोषित समाजाला स्वाभिमान दिला. _फकीरा, चंदनसुदरी, माकडीचा मेळा_ यांसारख्या साहित्यकृतींमधून त्यांनी सामाजिक समता आणि शोषणाविरुद्ध लढण्याचा संदेश दिला.
दोन्ही महापुरुषांचा वारसा राष्ट्रीय एकात्मता, सामाजिक समता आणि प्रबोधनाचा आहे. त्यांचे विचार आजही तरुण पिढीसाठी मार्गदर्शक आहेत आणि त्यांचा वारसा पुढे नेण्याची जबाबदारी आपली आहे, असे यावेळी प्रतिपादन करण्यात आले.
या कार्यक्रमाला भारतीय जनता पार्टीचे पदाधिकारी, कार्यकर्ते आणि नागरिक मोठ्या संख्येने उपस्थित होते.
याप्रसंगी भाजपा शहर अध्यक्ष संजय तिवारी, महिला शहर अध्यक्षा सौ. सुचिता लुटे, साजन गोहणे, अनिल बाम, लखन हिकरे, सुनिता घिवे, सविता गोहणे, नितू जैस्वाल, सुनिता पाटील, अनिता गोवर्धन, गणेश शेंडे, संजय पखाले,महेंद्र बाग, शंकर वाढरे, मुन्ना लोढे, दीपक मिसाला, राजेंद्र लुटे आदी उपस्थित होते.
कार्यक्रमाचे प्रास्ताविक साजन गोहणे यांनी केले तर सूत्रसंचालन अनिल बाम यांनी केले. कार्यक्रमाची सांगता राष्ट्रगीताने झाली.
