लॉयड्स फाऊंडेशनचा ‘निर्मल जल’ उपक्रम: चंद्रपूरच्या ८ गावांमध्ये आरओ वॉटर एटीएम, १६ हजार नागरिकांना शुद्ध पाणी घराजवळ
स्मार्ट कार्डने पारदर्शक वितरण; महिलांची आणि ज्येष्ठांची पाण्यासाठीची भटकंती थांबली
चंद्रपूर : ग्रामीण भागातील पिण्याच्या पाण्याचा प्रश्न कायमचा सोडविण्यासाठी लॉयड्स इन्फिनाइट फाऊंडेशनने आपल्या CSR उपक्रमांतर्गत ‘निर्मल जल’ योजना यशस्वीपणे राबविली आहे. चंद्रपूर जिल्ह्यातील शेणगाव, म्हातारदेवी, नकोडा, धानोरा, पांढरकवडा, मुरसा, बेलसणी आणि वढा या आठ गावांमध्ये अत्याधुनिक आरओ वॉटर एटीएम उभारण्यात आले आहेत. यामुळे अंदाजे १५ ते १६ हजार नागरिकांना दररोज शुद्ध आणि सुरक्षित पिण्याचे पाणी उपलब्ध झाले आहे.
दूषित पाण्यामुळे ग्रामीण भागात डायरिया, टायफॉईड, कावीळ आणि पोटाचे विकार वाढत होते. ही बाब लक्षात घेऊन फाऊंडेशनने आरओ तंत्रज्ञानावर आधारित हा प्रकल्प हाती घेतला. प्रत्येक गावात बसवलेल्या वॉटर एटीएममधून नागरिकांना स्मार्ट कार्डच्या माध्यमातून ठराविक प्रमाणात शुद्ध पाणी दिले जात आहे. त्यामुळे पाणी वितरणात पारदर्शकता आली असून गैरप्रकाराला आळा बसला आहे.
*महिलांसाठी मोठा दिलासा*
यापूर्वी शुद्ध पाण्यासाठी महिलांना आणि ज्येष्ठ नागरिकांना लांबवर जावे लागत होते. आता गावातच एटीएम उपलब्ध झाल्याने वेळ आणि श्रम दोन्हीची बचत झाली आहे. प्रकल्पामुळे घरातील महिलांना दैनंदिन कामांसाठी अधिक वेळ मिळत असून, शाळकरी मुलांनाही शुद्ध पाणी मिळत असल्याने त्यांच्या आरोग्यात सुधारणा झाल्याचे ग्रामस्थांनी सांगितले.
एका लाभार्थी महिलेने सांगितले की, “आधी २-३ किलोमीटरवरून पाणी आणावे लागायचे. आता कार्ड लावले की लगेच शुद्ध पाणी मिळते. मुलांची तब्येतही चांगली राहू लागली आहे.”
*आरोग्य आणि खर्चात बचत*
फाऊंडेशनच्या अधिकाऱ्यांनी दिलेल्या माहितीनुसार, शुद्ध पाण्यामुळे जलजन्य आजारांचे प्रमाण कमी होण्यास मदत होत आहे. त्यामुळे कुटुंबांचा दवाखान्यावरील खर्चही कमी झाला आहे. ‘स्वच्छ पाणी हा प्रत्येकाचा मूलभूत हक्क आहे’ या संकल्पनेला या उपक्रमाद्वारे प्रत्यक्ष आकार मिळाला आहे.
लॉयड्स इन्फिनाइट फाऊंडेशन केवळ पाण्यापुरतेच मर्यादित नाही. आरोग्य, शिक्षण, महिला सक्षमीकरण, कौशल्य विकास, स्वच्छता आणि ग्रामीण पायाभूत सुविधा या क्षेत्रांमध्येही फाऊंडेशनचे विविध उपक्रम सुरू आहेत. हजारो नागरिकांना त्याचा थेट लाभ होत आहे.
या उपक्रमाबद्दल ग्रामस्थांनी समाधान व्यक्त केले आहे. पिण्याच्या पाण्याची समस्या दूर झाल्याने गावाचा विकास वेगाने होईल, अशी आशा त्यांनी व्यक्त केली. भविष्यातही अशाच प्रकारचे लोकाभिमुख उपक्रम राबवावेत, अशी मागणीही यावेळी करण्यात आली.
फाऊंडेशनच्या वतीने सांगण्यात आले की, ग्रामीण भागाचा सर्वांगीण विकास आणि जीवनमान उंचावणे हे त्यांचे ध्येय आहे. ‘निर्मल जल’च्या माध्यमातून प्रत्येक घरापर्यंत शुद्ध पाणी पोहोचविण्याचा प्रयत्न भविष्यातही सुरू राहणार आहे.
