बल्लारपूरमध्ये पिण्याच्या पाण्याच्या स्रोताजवळ मृत म्हैस आढळल्याने खळबळ, तात्काळ कारवाईमुळे टळला मोठा धोका
सुवर्ण भारत : शंकर महाकाली (संपादक)
बल्लारपूर : शहरासाठी अत्यंत महत्त्वाच्या असलेल्या नदीच्या पाण्याच्या स्रोताजवळ मृत म्हैस आढळल्याने परिसरात एकच खळबळ उडाली. याच स्रोतामधून बल्लारपूर शहरातील विविध भागांना पिण्याचे पाणी पुरवठा केला जातो. त्यामुळे या घटनेमुळे जलप्रदूषणाचा गंभीर धोका निर्माण झाला असून नागरिकांमध्ये भीतीचे वातावरण पसरले.
मिळालेल्या माहितीनुसार, स्थानिक नागरिकांना पाण्याच्या स्रोताजवळ मृत म्हैस दिसून आली. त्यानंतर परिसरात दुर्गंधी पसरू लागली आणि पाण्याच्या शुद्धतेबाबत शंका निर्माण झाली. ही परिस्थिती कायम राहिली असती तर जलप्रदूषण वाढून नागरिकांच्या आरोग्यावर गंभीर परिणाम होण्याची शक्यता होती.
या गंभीर बाबीची दखल घेत भाजप शहर सचिव श्रावंती इसमपेली (कुसुमा) यांनी तात्काळ जल प्राधिकरण विभागाच्या अधिकाऱ्यांकडे तक्रार नोंदवली. त्यांनी सांगितले की, हा विषय थेट नागरिकांच्या आरोग्याशी संबंधित असून याकडे दुर्लक्ष होणे धोकादायक ठरू शकते.
तक्रार मिळताच संबंधित विभागाने तत्काळ कारवाई करत पथक घटनास्थळी पाठवले. अधिकाऱ्यांनी आणि कर्मचाऱ्यांनी त्वरित मृत म्हैस पाण्याच्या स्रोताबाहेर काढली. त्यासोबतच पाण्याची गुणवत्ता तपासण्याचे आणि जलस्रोताची स्वच्छता करण्याचे कामही हाती घेण्यात आले.
प्रशासनाच्या या जलद कारवाईचे नागरिकांकडून स्वागत करण्यात आले आहे. मात्र भविष्यात अशा घटना टाळण्यासाठी कायमस्वरूपी उपाययोजना करण्याची मागणीही नागरिकांनी केली आहे. जलस्रोतांची नियमित पाहणी, सुरक्षितता आणि स्वच्छता राखणे अत्यावश्यक असल्याचे मत व्यक्त करण्यात येत आहे.
या घटनेतून पुन्हा एकदा स्पष्ट झाले आहे की, पिण्याच्या पाण्याच्या स्रोतांची योग्य देखभाल आणि सतत निगराणी ठेवणे अत्यंत गरजेचे आहे, जेणेकरून नागरिकांना सुरक्षित व स्वच्छ पाणी उपलब्ध होईल.
